દીવાળીમાં ડુંગળી રડાવશે, જથ્થાબંધ બજારમાં તેજી

0
1868

નાશિકઃ મહારાષ્ટ્રના નાશિકમાં લાસલગામ ડુંગળી બજારમાં કીમતમાં સતત વધારો થઈ રહ્યો છે. જથ્થાબંધ વેપાર કરતા વેપારીઓનું માનીએ તો દીવાળી સુધી ડુંગળીના ભાવોમાં સતત વધારો થતો રહેશે. એપીએમસીના વેપારીઓએ જણાવ્યું કે જરૂરિયાતની આપૂર્તિ વચ્ચે વધી રહેલા અંતરના કારણે ડુંગળીના ભાવો સતત વધી રહ્યા છે. એપીએમસીમાં છેલ્લાં 10 દિવસમાં ડુંગળીના ભાવમાં 80 ટકા જેટલો વધારો નોંધાયો છે.

સોમવારે જ્યારે બજાર ખુલ્યું ત્યારે ડુંગળીના ભાવોમાં 21.33 ટકા જેટલો વધારો નોંધાયો હતો. ગત શુક્રવારના રોજ ડુંગળીનો ભાવ 2.020 રૂપિયા પ્રતિ ક્વિંટલ હતો જે સોમવારના રોજ વધીને 2,451 રૂપિયા પ્રતિક્વિંટલ થઈ ગયો.  ડુંગળીના ભાવમાં વધારાની અસર આવનારા દિવસોમાં છૂટક વેચાણ પર પણ પડશે. અત્યારે નાશિકમાં ડુંગળીનું છૂટક વેચાણ 30 રૂપિયા પ્રતિ કીલોના ભાવથી થઈ રહ્યું છે અને આવનારા દિવસોમાં આની કિંમત 35 રૂપિયા પ્રતિ કીલો સુધી પહોંચે તેવી શક્યતાઓ છે અને દેશના અન્ય ભાગની વાત કરીએ તો ત્યાં ડુંગળી 50 રૂપીયા પ્રતિકીલો સુધી પહોંચી શકે છે.

લાસલગામ એપીએમસી અનુસાર અભાવના કારણે દેશના દક્ષિણ ભાગમાં ડુંગળીની માગ વધી ગઈ છે.સૌથી મોટી અને મહત્વની વાત એ છે કે દીવાળી દરમિયાન લાસલગામ સહિત ડુંગળીનું વેચાણ કરનારા જિલ્લાના અન્ય એપીએમસી માર્કેટ એક સપ્તાહ સુધી બંધ રહેશે એટલા માટે ડુંગળીના ભાવમાં વધારો કરી દેવામાં આવ્યો છે.