Cooking Tips

૧૦ મિનિટમાં રબડી તૈયાર!!!

0

સામગ્રીઃ 4 કપ મલાઈવાળું દૂધ, 2-3 ચમચા સાકર, 1 ચમચી એલચી પાવડર, 6-7 તાર કેસર અડધા કપ દૂધમાં પલાળેલું, 1 કપ તાજું પનીર, 1½  કપ માવો, 8-10 બદામ-પિસ્તા, 1 ચમચી ગુલાબનું એસેન્સ

રીતઃ એક જાડા તળિયાવાળી કઢાઈમાં દૂધ ગરમ કરવા મૂકો. દૂધમાં એક ઉભરો આવે એટલે ગેસની આંચ મધ્યમ કરી દો. પનીર તેમજ દૂધનો માવો લઈ એને ક્રમ્બલ એટલે કે એનો બારીક ભૂકો કરીને દૂધમાં હળવે હળવે ઉમેરી દો. 5-10 મિનિટ સુધી એક લાંબો ઝારો લઈ દૂધમાં હલાવતાં રહો, જેથી દૂધ કઢાઈમાં નીચે ન ચોંટે. હવે એલચી પાવડર, ગુલાબ જળ તથા દૂધમાં ઓગાળેલું કેસર દૂધમાં મેળવી ગેસ બંધ કરી કઢાઈ નીચે ઉતારી લેવી અને એમાં કાજુ તેમજ બદામની કાતરી મિક્સ કરી દો. ઈન્સ્ટન્ટ રબડી તૈયાર છે.

પૌષ્ટિકતાસભર નાચણીના લાડુ

0

સામગ્રીઃ 1 કપ નાચણીનો લોટ, 5-6 ટેબલ સ્પૂન ઘી, 5 ટેબલ સ્પૂન બુરૂં સાકર, ¼ ચમચી એલચી પાવડર

રીતઃ એક કઢાઈમાં ઘી ગરમ થાય એટલે નાચણીનો લોટ ગુલાબી રંગનો થાય ત્યાં સુધી શેકી લો. હવે ગેસ બંધ કરી કઢાઈ નીચે ઉતારી એમાં બુરૂં સાકર તેમજ એલચી પાવડર ઉમેરી દો અને લાડુ વાળી દો.

બટેટા તેમજ ગુલકંદના ગુલાબજાંબુ

0

ફરાળી ગુલાબજાંબુ માટે સામગ્રીઃ બાફેલાં બટેટા 250 ગ્રામ, માવો – 100 ગ્રામ, આરારોટ – 50 ગ્રામ, થોડું દૂધ, ગુલાબજાંબુ તળવા માટે ઘી, તેમજ થોડો ગુલકંદ

ચાસણી માટે સામગ્રીઃ 2 કપ ખાંડ, 2 ½ કપ પાણી, 1 ચમચી એલચી પાવડર, થોડું કેસર, ગુલાબની પાંખડીઓ

રીતઃ ગુલાબજાંબુ માટે આપેલી સામગ્રીમાં ઘી અને ગુલકંદ સિવાયની બધી વસ્તુઓ લઈ થોડું દૂધ લઈ હળવે હાથે લીસો  લોટ બાંધો. લોટ બંધાય એટલે થોડો લોટ લઈ તેની થેપલી કરી એમાં થોડું ગુલકંદ ઉમેરીને એના ગોટી જેવા નાનાં ગોળા વાળો. આ જ રીતે બધાં ગોળા વાળવા. ત્યારબાદ કોટનનો પાતળો રૂમાલ પાણીમાં નિચોવીને બધાં ગોળા ઢંકાય એમ ઢાંકી દો. થોડી વાર પછી ઘીમાં ધીમે તાપે ગોળા તળી લો.

ચાસણી માટે એક તપેલામાં પાણી અને ખાંડ ભેગા કરી ગેસ પર ઉકળવા મૂકો. એક તારની ચાસણી તૈયાર થાય એટલે એલચીનો ભૂકો તેમજ થોડું કેસર અને ગુલાબની પાંખડીઓ ઉમેરી દો. ચાસણી મધ્યમ ઠંડી થાય એટલે ગુલાબજાંબુ એમાં ઉમેરી દો. અને એક કલાક રહેવા દો.

પકોડા તે પણ હેલ્ધી!!

0

પાલખ પકોડા બનાવવા માટે પાલખના પાનની દાંડીઓ તોડી લો. બધાં પાનને સરખાં પાણીમાં ધોઈને પેપર પર મૂકીને પાણી નિતારી લો.

હવે, પકોડા માટે ખીરૂં બનાવવા માટે ચણાના લોટમાં થોડો અજમો, થોડા સફેદ તલ, ચપટી હીંગ, આદુ-મરચાંની પેસ્ટ (તમે ઈચ્છો તો લાલ મરચાં પાવડર પણ ઉમેરી શકો છો),  મીઠું સ્વાદાનુસાર,  ચપટી સોડા ખાર લઈ બધી સામગ્રી ભેગી કરી થોડું પાણી નાખી ખીરૂં બનાવો.

કઢાઈમાં તેલ ગરમ કરવા મૂકો. તેલ ગરમ થાય એટલે પાલખનાં એક-એક પાન લઈ ખીરામાં બોળીને તેલમાં તળી લો. બધાં ભજીયા તૈયાર થાય એટલે પ્લેટમાં મૂકતી વખતે દરેક ભજીયા પર ચાટ મસાલો છાંટી દો. આ ભજીયા લીલી ચટણી અથવા ટોમેટો સોસ સાથે પીરસો.

શાહી મીઠાઈ જે ઘરે બની શકે!!!

0

આ મીઠાઈનું નામ કદાચ સાંભળ્યું નહિં હોય, એનું નામ છે ‘શાહી ટુકડા’. વાંચો મીઠાઈ બનાવવાની રીત…

શાહી ટુકડા માટે સામગ્રીઃ  બ્રેડની 5-6 સ્લાઈસ લો (ઘઉંની બ્રેડ પણ લઈ શકો છો), ઘી તળવા માટે, 1 કપ સાકર, અડધો કપ પાણી તેમજ રબડી.

રબડી બનાવવા માટે સામગ્રીઃ 1 લિટર મલાઈવાળું દૂધ, 2-3 ચમચા સાકર, 1 ચમચી એલચી પાવડર, 6-7 તાર કેસર અડધા કપ દૂધમાં પલાળેલું, 3 ચમચા દૂધનો પાવડર, 8-10 બદામ-પિસ્તા, 1 ચમચી ગુલાબ જળ.

રીતઃ બ્રેડને ચાર ટુકડામાં કટ કરી લો અથવા તમને ગમે તે આકારમાં કટ કરી લો. હવે એક કઢાઈમાં ઘી ગરમ કરવા મૂકીને બ્રેડના ટુકડા તળી લો. તમે બ્રેડને શેલો ફ્રાઈ પણ કરી શકો છો. પણ બ્રેડ ક્રિસ્પી થવી જોઈએ.

હવે સાકરમાં અડધો કપ પાણી ઉમેરી એક તારની ચાસણી બનાવી લો.

એક જાડા તળિયાવાળી કઢાઈમાં દૂધ ગરમ કરવા મૂકો. દૂધમાં એક ઉભરો આવે એટલે ગેસની આંચ મધ્યમ કરી દો. એમાંથી એક કપ ગરમ દૂધ લઈ એમાં દૂધનો પાવડર ગઠ્ઠાં ના રહે એમ મિક્સ કરીને કઢાઈમાંના દૂધમાં ફરીથી ઉમેરી દો. હવે એક લાંબો ઝારો જે કઢાઈમાં નીચે તળિયા સુધી પહોંચતો હોય તે લઈને દૂધમાં હલાવતાં રહો. જેમ જેમ મલાઈનો થર જામે તેમ તેમ મલાઈને કઢાઈમાં એક બાજુ પર કરતાં રહેવું. ધ્યાન રહે કે ઝારો હલાવતાં રહેવું, જેથી દૂધ કઢાઈમાં નીચે ન ચોંટે. એ રીતે પા લિટર જેટલું દૂધ બાકી રહે ત્યારે તેમાં એલચી પાવડર, ગુલાબ જળ તથા દૂધમાં ઓગાળેલું કેસર મેળવી ગેસ બંધ કરી કઢાઈ નીચે ઉતારી લેવી અને બાજુ પર કરેલી બધી મલાઈ દૂધમાં મિક્સ કરી દો. હવે એમાં કાજુ તેમજ બદામની કાતરી મિક્સ કરી દો. રબડી તૈયાર છે.

શાહી ટુકડા તૈયાર કરવા માટે ઘીમાં તળેલાં બ્રેડનાં દરેક ટુકડાને સાકરની ચાસણીમાં પલાળીને, નિતારીને એક પ્લેટમાં ગોઠવો અને પછી એક ચમચાથી રબડી લઈ દરેક ટુકડા પર ફેલાવીને મૂકતાં જાવ. સ્વાદિષ્ટ શાહી ટુકડા તૈયાર છે.

 

આ ખમણ કોઈને ન ભાવે એવું તો ન જ બને!!!

0

સામગ્રીઃ ચોખા 1 વાટકી, ચણાની દાળ 1 વાટકી, અળદની દાળ ½ વાટકી, મગની દાળ ½ વાટકી, 1 ઈંચ આદુનો ટુકડો, 4-5 લીલાં મરચાં, મીઠું સ્વાદાનુસાર, 8-10 મેથીનાં દાણાં, થોડી રાઈ, ચપટી સોડા ખાર, અડધો કપ દહીં, ચપટી હીંગ તેમજ તેલ.

રીતઃ ચોખા ધોઈને પાણીમાં પલાળો ત્યારે એમાં થોડાં મેથીનાં દાણાં ઉમેરો. બધી દાળ એકસાથે ધોઈને પલાળી દો. દાળ તેમજ ચોખા 8 કલાક માટે પલાળી દો, ત્ચારબાદ મિક્સરમાં દાળ-ચોખા એકસાથે લઈ, એક વાર અધકચરું અને બીજીવાર બારીક એવું મિશ્રણ પીસી લો. સાથે આદુ-મરચાં પણ પીસી લો. ચપટી હીંગ તેમજ મીઠું સ્વાદાનુસાર ઉમેરી દો અને મિશ્રણને આઠ કલાક માટે રહેવા દો. ખમણ બનાવવાના અડધા કલાક પહેલાં ખીરામાં અડધો કપ દહીં ઉમેરી દો.

ખમણ બનાવવા માટેના વાસણમાં એક સ્ટેન્ડ અથવા કાંઠો મૂકી પાણી રેડી દો તેમજ તેલ લગાડેલી થાળી જાળી પર મૂકીને વાસણ ગરમ કરવા મૂકો. હવે એક થાળી જેટલું મિશ્રણ એક બાઉલમાં લઈ તેમાં પા ચમચી સોડા ખાર તેમજ 2 ચમચી તેલ નાખી એક ચમચા વડે મિશ્રણ ફેંટો, જેવું મિશ્રણ થોડું ઉપર આવે( ફુલવા માંડે) કે તરત તેલ લગાડેલી થાળીમાં રેડી દો. અને થાળી મૂકેલું વાસણ ઢાંકી દો.

20-25 મિનિટ પછી થાળી ઉતારી લો. અને તેલમાં રાઈ તતડાવીને વઘાર ખમણની થાળી પર ચમચી વડે રેડી દો અને ખમણના કટકા કરી લો.

રાતની વધેલી રોટલીના ગુલાબજાંબુ

0

રાત્રે વધેલી રોટલી તવામાં ક્રિસ્પી થાય પણ બળે નહીં એ રીતે શેકી લો. થોડી ઠંડી થાય એટલે એના નાનાં ટુકડા કરી, મિક્સરમાં પિસી લો. આ રોટલીના પાવડરમાં થોડો એલચીનો પાવડર ઉમેરી દૂધ વડે લોટ બાંધી લો. (થોડું થોડું દુધ ઉમેરતાં જાવ અને લોટ બાંધતા જાવ). લોટ બંધાઈ જાય એટલે થોડું ઘી લગાડી લોટ લીસો કરી લો. હવે લોટના ગોળ અથવા લંબગોળ ગોળા વાળીને ઘીમાં મધ્યમ આંચે તળી લો.

બીજી બાજુ ખાંડની ચાસણી બનાવી લો. ચાસણી બનાવતી વખતે એમાં થોડો એલચીનો પાવડર ઉમેરવો. તળેલા ગુલાબજાંબુ ઠંડા થાય એટલે ચાસણીમાં નાખીને એક કલાક સુધી રહેવા દો.

અજમાવોઃ પૌંઆની કટલેસ…

0

પૌંઆને બે વખત પાણીથી ધોઈને પાંચેક મિનિટ સુધી પાણીમાં પલાળી રાખો. પછી ચાળણીમાં પાણી નિતારી લો.

હવે નિતારેલા પૌંઆમાં એક બાફેલું બટેટું છુંદીને તેમજ ઝીણાં સુધારેલાં મિક્સ વેજીટેબલ્સ (ફણસી તેમજ લીલાં વટાણાં બાફી લેવા), એક કાંદો ઝીણો સમારેલો (જો નાખવો હોય તો), ગરમ મસાલો, લાલ મરચાંનો પાવડર, આદુ-મરચાંની પેસ્ટ, આમચૂર પાવડર, ઝીણી સમારેલી કોથમીર તેમજ મીઠું સ્વાદાનુસાર ઉમેરીને મિક્સ કરી દો. અને કટલેસનો આકાર આપીને પેનમાં થોડું તેલ નાંખીને કટલેસ સાંતડી લો.

ઈન્સ્ટન્ટ રેસિપી નાની-મોટી ઉજવણીમાં પણ મઝાની…

0

સામગ્રીઃ 2-3 કાંદા, 2 ટમેટાં, 1 સિમલા મરચું, આદુ-મરચાં તેમજ લસણની પેસ્ટ, લાલ મરચાં પાવડર, હળદર, ધાણાજીરૂં, મીઠું સ્વાદ મુજબ, પાંઉભાજીનો મસાલો,  બટર અથવા તેલ, જીરૂં તથા હીંગ વઘાર માટે, 4-5 પાંઉ બે સ્લાઈસમાં કટ કરેલાં.

એક મોટા તવામાં બટર અથવા તેલ ગરમ કરી જીરા તેમજ હીંગનો વઘાર કરો. આદુ-મરચાં તેમજ લસણની પેસ્ટ સાંતડીને ઝીણાં સમારેલાં કાંદા તેમજ ટમેટાં ઉમેરીને બરાબર સાંતડી દો અને બધાં મસાલા ઉમેરીને 2-3 મિનિટ સુધી થવા દો, પછી ઝીણું સમારેલું સિમલા મરચું ઉમેરીને સાંતડો. હવે થોડું પાણી ઉમેરીને મિશ્રણને થવા દો એટલે કાંદા-ટમેટાં નરમ થઈને મસાલો એમાં એકરસ થશે. પાણી થોડું સૂકાય એટલે બધું મિશ્રણ તવાની એકતરફ કરી દો અને વચ્ચે એક ચમચી બટર નાખીને બંન્ને તરફથી પાંઉને શેકી લો (પાંઉને કડક પણ કરી શકો છો). હવે એક ચમચીથી મિશ્રણને પાઉંની સ્લાઈસ ઉપર લગાડીને તવામાં થોડું શેકીને ઉતારી લો. આવી જ રીતે બાકીનાં પાંઉ પણ તૈયાર કરી લો.

એક પ્લેટમાં તૈયાર કરેલાં બધાં પાંઉ મૂકીને ઉપર થોડાં ઝીણાં સમારેલાં કાંદા તેમજ કોથમીર સજાવી દો. ઉપર ચીઝ ખમણીને નાખી શકો.

રવાના શીરામાં કેળાં નાખી તો જુઓ!!

0

શીરો બનાવતાં પહેલાં 1-2 પાકાં કેળા લઈ તેમાં થોડું દેશી ઘી નાંખી કેળાંનો છુંદો અથવા બારીક ટુકડા કરી બાજુએ રહેવા દો.

હવે રવાને ઘીમાં હલકો ગુલાબી શેકો. થોડીવાર પછી કેળાંનો છુંદો/ટુકડા એમાં ઉમેરી મિક્સ કરી કેળાં ઓગળે ત્યાં સુધી શેકો. પછી દૂધ તેમજ પાણી નાખીને ધીમી આંચે થોડીવાર શીરો થવા દો. ત્યારબાદ તેમાં સાકર ઉમેરી, એલચી-જાયફળનો પાવડર નાંખી દો. ફરીથી શીરામાં ઘી છૂટે ત્યાં સુધી ધીમી આંચે શીરો થવા દો. શીરો તૈયાર થાય એટલે કાજુ-બદામની કાતરી ઉપર સજાવી દો.

WAH BHAI WAH